dil ka har ek daagh charaghan se kam nahin
meri ḳhizan bhi fasl-e-baharan se kam nahin
is men hai ḳhun-e-dil ka samundar chhupa hua
ankhon men ek ashk bhi tufan se kam nahin
yadon men hain gulab se chehre saje hue
shahr-e-ḳhayal kucha-e-janan se kam nahin
hai ḳhaak par nashist falak par uḌaan hai
meri zamin bhi taḳht-e-sulaiman se kam nahin
jiine ka hausla bhi mayassar na ho jise
us ki sahar bhi sham-e-ghariban se kam nahin
nikle kisi ki yaad men aansu jo aankh se
mere liye vo la.al-e-badaḳhshan se kam nahin
ankhon ke samne hain manazir ajiib se
ye jagna bhi ḳhvab-e-pareshan se kam nahin
‘shahid’ firaq-e-yad men ye dil ka haal hai
viraniyon men dasht-o-bayaban se kam nahin
Leave a Reply