Hasan Abbasi
ḳhvab men nuur barasne ka saman hota hai
aankh khulti hai to kamre men dhuan hota hai
dhuup aisi dar-o-divar pe Thahri aa kar
ghar pe aaseb ke saa.e ka guman hota hai
ḳhvab men ja ke use dekh to aa.uun lekin
ab vo ankhon ke darichon men kahan hota hai
din ko hoti hai jo logon ke guzarne ki jagah
shaam ke ba.ad vahan mera makan hota hai
ḳhauf an-jana koi pichhe paḌa hai aise
jis jagah jaata huun kam-baḳht vahan hota hai
yuun mire aage ubhar aata hai vo shaḳhs ‘hasan’
mere andar hi kahin jaise nihan hota hai
Leave a Reply