sab tamannaon se ḳhvabon se nikal aa.e hain
ham bahut duur sarabon se nikal aa.e hain
ḳhud ko jab bhuul se jaate hain to yuun lagta hai
zindagi tere azabon se nikal aa.e hain
raushni mujh ko mili hai to zara janch to luun
aaj sab chehre naqabon se nikal aa.e hain
ham nikal aa.e bahisht-e-shab-e-tanha.i se
aur kuchh log hijabon se nikal aa.e hain
ham bhi is shahr ki viran si raunaq men kahan
apne manus ḳharabon se nikal aa.e hain
Leave a Reply