kuchh na kuchh ishq ki tasir ka iqrar to hai
us ka ilzam-e-taghaful pe kuchh inkar to hai
har fareb-e-gham-e-duniya se khabar-dar to hai
tera divana kisi kaam men hushyar to hai
dekh lete hain sabhi kuchh tire mushtaq-e-jamal
khair didar na ho hasrat-e-didar to hai
maarke sar hon usi barq-e-nazar se ai husn
ye chamakti hui chalti hui talvar to hai
sar patakne ko patakta hai magar ruk ruk kar
tere vahshi ko khayal-e-dar-o-divar to hai
ishq ka shikva-e-beja bhi na bekar gaya
na sahi jaur magar jaur ka iqrar to hai
tujh se himmat to padi ishq ko kuchh kahne ki
khair shikva na sahi shukr ka izhar to hai
is men bhi rabta-e-khas ki milti hai jhalak
khair iqrar-e-mohabbat na ho inkar to hai
kyuun jhapak jaati hai rah rah ke tiri barq-e-nigah
ye jhijak kis liye ik kushta-e-didar to hai
kai unvan hain mamnun-e-karam karne ke
ishq men kuchh na sahi zindagi be-kar to hai
sahar-o-sham sar-e-anjuman-e-naz na ho
jalva-e-husn to hai ishq-e-siyahkar to hai
chaunk uthte hain ‘firaq’ aate hi us shokh ka naam
kuchh sarasimgi-e-ishq ka iqrar to hai
Leave a Reply