Jafar Tahir
ye tamanna thi ki ham itne suḳhnavar hote
ik ghazal kahte to abad ka.i ghar hote
duriyan itni dilon men to na hotin yarab
phail jaate ye jazire to samundar hote
apne hathon pe muqaddar ke navishte bhi paḌh
na sahi ma.ani zara lafz to behtar hote
dil pe ik vahi aur ilham ka rahta hai saman
ham agar rind na hote to payambar hote
ham agar dil na jalate to na jalte ye charagh
ham na rote jo lahu aa.ine men patthar hote
ham agar jam-ba-kaf raqs na karte rahte
teri rahon men sitare na gul-e-tar hote
ghar bana baiThe bayaban men divane varna
paanv uTh jaate to jibril ka shahpar hote
suraten yuun to na yaron ki rulati rahtin
ai gham-e-marg ye sadme to na dil par hote
ham rahe garche tahi-dast hi jafar-‘tahir’
bas men ye baat bhi kab thi ki abuzar hote
Leave a Reply