dam-e-sub.h pi li sar-e-sham pi li
agar mil ga.i ek do jaam pi li
na aghaz socha na anjam pi li
rakha ham ne piine se bas kaam pi li
main ai shaiḳh insan hi to huun aḳhir
ghaTaon ne phaila diye daam pi li
zamane ki be-rahm gardish ke hathon
na paaya jahan men jo aram pi li
kabhi ham ne saghar pe saghar lunDha.e
kabhi ham ne durd-e-tah-e-jam pi li
tiri rahmaton ke bharose pe ham ne
ka.i baar le kar tira naam pi li
mai-e-lala-gun ke piyale men ham ne
jo dekha ruḳh-e-mah-e-gulfam pi li
ḳhuda se na jhijhke to duniya ka Dar kya
jo piine pe aa.e sar-e-am pi li
kisi shoḳh ki mast ankhon ne ‘sa.ib’
diya bada-noshi ka paigham pi li
Leave a Reply