Ismail Merathi
gar nashe men koi be-fikr-o-taammul bandhe
chashm-e-mai-gun ko tiri jam-e-pur-az-mul bandhe
zikr-e-qamat men agar fikr taraqqi na kare
rashk-e-tuba to likhe go ba-tanazzul bandhe
taba ki silsila-jumban jo pareshani ho
gesu-e-ghaliya sa ko tire sumbul bandhe
naala to vo hai ki ghabra ke utha de parda
lek nazzare ki himmat bhi tahammul bandhe
kuchh na ban aaegi jab luut machaegi khizan
ghuncha har chand girah kas ke zar-e-gul bandhe
ru-ba-ru us ke lab-e-arz-e-tamanna na hile
zor-e-afsun-e-nazar se gae bilkul bandhe
hain tire band-e-qaba uqda-e-dushvar mire
ki jo khole na khule aur jo gae khul bandhe
na bache par na bache sail-e-fana se na bache
gar koi kangura-e-charkh pe bhi pul bandhe
aankh khulne bhi na paai thi ki us ne fauran
band burqe ke ba-andaz-e-taghaful bandhe
haae vo said ki sayyad ke pichhe lapke
sar ko fitrak pe har-dam ba-tafavul bandhe
Leave a Reply