Ayaz Rasool Nazki
aas men kaaTe biis baras aur yaas men kaaTe biis baras
kuchh na puchho ham ne kaise kaaTe hain chalis baras
jis ne ham ko ishq sikhaya jis se samjhe saare gur
us ki umr thi sola satrah apni thi ikkis baras
aate jaate har mausam men us ka jaadu qaa.em hai
biis baras se dekh raha huun lagti hai unnis baras
mera jism bhi suukh chala hai niil ke sahil jaisa khet
mulk-e-suleman par tu lahra badal bin bilqis baras
aḳhir shab men saare momin resha resha bhiig ga.e
zahid jitne ḳhushk bache hain un pe tu iblis baras
ham ko bichhḌe kitne guzre saal bata duun ai kashmir
tere sola mere sola hote hain battis baras
Leave a Reply