Shah Naseer
ho chuki baagh men bahar afsos
aah ai bulbulo hazar afsos
qafila umr ka hai pa-ba-rikab
ziist ka kya hai e’tibar afsos
miri raton ko dekh sokhtagi
na kiya ek din bhi yaar afsos
shab se parvane ki lagan men shama
subh tak roi zaar zaar afsos
sakht be-tabi se kati kal raat
aaj bhi dil hai be-qarar afsos
khal-o-khat ko samajh ke dana-o-dam
murgh-e-dil ho gaya shikar afsos
aah dast-e-junun se ai naseh
hai gareban taar taar afsos
jaan honton pe aa gai hamdam
lekin ab tak phira na yaar afsos
umr ghaflat men kat gai hai ‘nasir’
aah afsos sad-hazar afsos
Leave a Reply