mausam-e-gul par khizan ka zor chal jaata hai kyuun
har hasin manzar bahut jaldi badal jaata hai kyuun
yuun andhere men dikha kar raushni ki ik jhalak
meri mutthi se har ik jugnu nikal jaata hai kyuun
raushni ka ik musafir thak ke ghar aata hai jab
to andhera mere suraj ko nigal jaata hai kyuun
tere lafzon ki tapish se kyuun sulag uthti hai jaan
sard-mehri se bhi teri dil ye jal jaata hai kyuun
ab ke jab lautega vo to fasla rakkhenge ham
ye irada us ke aate hi badal jaata hai kyuun
duur hai suraj ‘alina’ phir bhi us ki dhuup se
barf ki chadar men lipta tan pighal jaata hai kyuun
Leave a Reply