Poet
dil hai sahra se kuchh udaas bahut
ghar ko viran karun to ghaas bahut
ro.ab paḌ jaa.e us pe lahje ka
mudda.a kam ho iltimas bahut
meri tanha.iyon ki duniya men
log rahte hain as-pas bahut
hai ajab haal gham ke suraj ka
raushni kam hai in.ikas bahut
mutma.in dil ho kya haqiqat se
hai miri soch men qayas bahut
log marte hain ik ḳhushi ke liye
ham masarrat men hain udaas bahut
dur-uftada-e-chaman ke liye
ek hi phuul ki hai baas bahut
ḳhadd-o-ḳhal us ke aur ye chehre
aise dekhe hain iqtibas bahut
jis se mansub talḳhiyan hain ‘nazar’
us ke lahje men hai miThas bahut
Leave a Reply