bahut ghaur-o-khauz ke baad bil-akhir
talash khatm kar di gai
is makan ki chobi sidhiyon ke
nisf daere par
jo hamari samt ka akhiri hissa bataya gaya hai
aur qali kar di gai
un tamam divar-gir andazon par
jo hamen tod-marod kar likhte the
alag kiye hue paanv
jo kisi ajnabi raste ka hissa nahin bane
chamde ke juton men saint kar rakh liye gae
vo ankhen darvazon se utaar kar
makhmalin keson men
hifazat se rakh di gai hain
jo kisi nae manzar ke frame men puuri nahin aa sakin
in par phunka gaya sehr
be-abad gharon ko
bataur-e-zakat de diya gaya
ab un gharon se raton ko hansne ki
jinnati avazen aati hain
vo haath bandhe rah gae
namaz ki ibtidai rakaaton men
aur nafli ibadaten musallon ke dilkash designon par
ungliyan pherti rah gaiin
aur ham jhad-phunk kar ek khandani taalluq
apne badan ke thailon men
sambhal ke rakh chuke
is liye
tum hamen apni yad-dasht ki sidhiyon se
dhakka de kar
khud ko nae sire se rasman taamir karo
Leave a Reply