Bujhe Charagh Se Mahtab Dekh Sakta Hun

bujhe charāġh se mahtāb dekh saktā huuñ

maiñ apne ḳhvāb meñ ye ḳhvāb dekh saktā huuñ

maiñ apnī aañkh ke ujḌe hue dayāroñ se

kisī bhī dasht ko shādāb dekh saktā huuñ

tumhārī yaad ke Thahre hue samundar meñ

chhupe hue haiñ jo girdāb dekh saktā huuñ

maiñ is zamāne kī rangīniyoñ ko pal bhar meñ

jamāl-e-yār meñ ġharqāb dekh saktā huuñ

mujhe vo nuur mayassar hai jis se der talak

maiñ apnī shab ko ‘sahartāb’ dekh saktā huuñ

Leave a Comment