Zulfiqar Naqvi
ḳhamosh zamzame hain mira harf-e-zar chup
har iḳhtiyar chup hai har ik e.atibar chup
bad-e-sumum darpai azar dekh kar
sakte men be-qarar hai bad-e-bahar chup
manzar nahin hain bolte sahra udaas hai
pathra ga.i hai aankh dil-e-daghdar chup
jo kuchh bhi ho raha hai ye maqsum to nahin
bas tujh ko kha ga.i hai tiri sogvar chup
har ek ko huun gosh-bar-avaz dekhta
oḌhe hue hon jab se main ik ba-vaqar chup
harf-e-dua na dast-e-talab dar pe aan kar
lab par faqat hai raqs men ik dil-figar chup
Leave a Reply