Rais Amrohvi
gard men aT rahe hain ehsasat
dhime dhime baras rahi hai raat
jal uTha ik charagh-e-sham to kya
bujh ga.e be-shumar imkanat
haa.e maazi ki dil-nashin yaden
haa.e ḳhunḳhar bheḌiyon ki barat
chyunTiyan jaise zehan par rengen
uf ye mere latif ehsasat
bhuut ban kar mujhe Darati rahin
meri na-afrida taḳhliqat
kaun aaya mire ta.aqub men
vahi fikr-o-ḳhayal ke jinnat
daf.atan kis ne qahqaha maara
ye andhere men kaun hai mire saat
sarsar-e-shab kahan ki patton men
karb-e-gham se karahti hai hayat
mujh se mujh ko na chhin kar le jaa.e
shahzadi-e-kishvar-e-zulmat
sub.h jaaga to yaad bhi na raha
raat thi chandni ki chandni raat
tuda-e-reg o naḳhl-e-ḳhushk-e-chinar
chhup ga.i kis ki oT men barsat
ye daraḳht-e-kuhan lisan-ul-ghaib
aur ye shaḳh-e-ḳhushk barg-e-nabat
kya yahi hai ‘ra.is’-amrohvi
uḌ ke aa.e hain duur se zarrat
Leave a Reply