kya ravish rakkhi hai phir aap ne auron ke liye
gar yahi tarz-e-mulaqat hai apnon ke liye
rasm-e-ulfat bhi agar aap ke adab men hai
to uTha rakkhi hai vo kaun se vaqton ke liye
jaan ka rog bana li jo mohabbat ham ne
ab vo sunte hain ki tafrih hai logon ke liye
teri baten ye tira harf-e-tasalli jaise
samne rakh de khilaune koi bachchon ke liye
kabhi aalam tha ki har ḳhat tha tira dida-e-tar
rah ga.e ab to ye auraq havalon ke liye
mere chehre pe ho kyuun rang-e-shikayat ‘anjum’
mere daman ka har ik taar hai yaron ke liye
Leave a Reply