Azad Gulati
raushni phaili to sab ka rang kaala ho gaya
kuchh diye aise jale har-su andhera ho gaya
jis ne mera saath chhoḌa aur kisi ka ho gaya
sach to ye hai mujh se bhi baḌh kar vo tanha ho gaya
vaqt ka ye moḌ kaisa hai ki tujh se mil ke bhi
tujh ko kho dene ka gham kuchh aur gahra ho gaya
ham ne tanha.i ki chadar taan li aur so ga.e
log jab kahne lage uTTho savera ho gaya
Dubta suraj huun main vo mera saaya dekh kar
sochta ye hai qad us ka mujh se lamba ho gaya
chand lamhe the jo barson ba.ad tak biite nahin
kuchh baras vo bhi the jin ka ek lamha ho gaya
jab zaban kholi to sab ko niind si aane lagi
chup hue to yuun laga har shaḳhs bahra ho gaya
saath us ka chhoḌ kar aa.e to ye aalam raha
ham ne jis chehre ko dekha us ka chehra ho gaya
is ta.alluq ko bhala ‘azad’ main kya naam duun
vo kisi ka ho ke bhi kuchh aur mera ho gaya
Leave a Reply