Naseer Parwaz
aarzu sulagti hai ho ke mas havaon se
aag si barasti hai savani ghaTaon se
bebasi-e-adam ka gham to ḳhair sab ko hai
kaun bhiik mangega rahm ke ḳhudaon se
na-murad jiina tha na-murad jiite hain
kya gila kare koi apne ashnaon se
gulsitan ki zaḳhm-e-dil kahkashan ki ashk-e-gham
ji larazne lagta hai ab hasin fazaon se
hadson ki basti men husn bhi pasheman hai
vo nazar churate hain aaj ḳhud jafaon se
ab na dil zaminon ka aur na asmanon ka
kar raha hai sargoshi ajnabi ḳhalaon se
intizar ka aalam kya bata.un ai parvaz
chaunk chaunk uThta huun saans ki sadaon se
Leave a Reply