Mujhse Anjaan to Nahin Ho Tum

mujh se anjān to nahīñ ho tum

itne be-dhyān to nahīñ ho tum

ye ba-zāhir jo be-niyāzī hai

kuchh pareshān to nahīñ ho tum

kaisī vahshat hai kyoñ bhaTakte ho

ḳhāna-vīrān to nahīñ ho tum

aao baiTho karo gile shikve

koī mehmān to nahīñ ho tum

ishq meñ kaam aql se loge

aise nādān to nahīñ ho tum

kyā kahā taḳhliya are tauba

koī sultān to nahīñ ho tum

Leave a Comment