kisi ko kab vo apne dil ka kuchh ahval deta hai
main us se baat karta huun vo mujh ko Taal deta hai
koi to hai jo is hairat-sara-e-nur-o-zulmat men
sitare ko ziya a.ine ko timsal deta hai
bahut inkar karta hai saval-e-vasl par lekin
ḳhafa ho ja.un to gardan men banhen Daal deta hai
koi chehron ka saudagar chhupa hai is ḳharabe men
purani suraten le kar na.i ashkal deta hai
main jis lamhe guzarte vaqt ko mahsus karta huun
vo ik lamha ‘farasat’ ranj-e-mah-o-sal deta hai
Leave a Reply