Abdul Wahab Sukhan
ghuncha-e-vasl sar-e-sham khila de aa kar
hijr ki rut men koi muzhda suna de aa kar
raqs jaari hai lahu ka miri shiryanon men
barbat-e-ruh men avaz mila de aa kar
log mar jaate hain be-chara-gari ke hote
dam-e-isa bhi nahin ab ki jila de aa kar
isi ummid pe sab ahl-e-karam baithe hain
koi saail ki tarah aae sada de aa kar
muskura kar miri ghazlon ko padha karta hai
sher apne bhi kabhi yaar suna de aa kar
naav kaghaz ki liye baitha huun jaane kab se
aa idhar sail-e-ravan is ko baha de aa kar
Leave a Reply