Shaz Tamkanat
yahi safar ki tamanna yahi thakan ki pukar
khaḌe hue hain bahut duur tak ghane ashjar
nahin ye fikr ki sar phoḌne kahan jaa.en
bahut buland hai apne vajud ki divar
daraz-qad ba-ada-e-ḳhiram kya kahna
tamam ahl-e-jahan ke liye hai dars-e-vaqar
ye daur vo hai ki sab nim-jan nazar aa.e
ki raqs men hai anaḌi ke haath men talvar
badalti rut hai rag-e-sabza men numu kam kam
kali kali pe tira naam likh rahi hai bahar
shikasta but hain jabin zaḳhm zaḳhm but-gar ki
sirhane tesha ke larzida hai koi jhankar
dikha.i de to vo bas ḳhvab men dikha.i de
mira ye haal ki main muddaton se huun bedar
vo log jo tujhe har roz dekhte honge
unhen ḳhabar nahin kya shai hai hasrat-e-didar
ze-farq-ta-ba-qadam rup-rang ki jhankar
tamam mehr-o-mohabbat tamam bos-o-kanar
tarah tarah se koi naam ‘shaz’ likhta tha
hatheliyon pe hina.i huruf the gul-kar
Leave a Reply