Abdul Hafiz Naeemi
har insan apne hone ki saza hai
bhare bazar men tanha khada hai
nae darbanon ke pahre bithao
hujum-e-dard badhta ja raha hai
rahe ham hi jo har patthar ki zad men
hamari sar-bulandi ki khata hai
mahakte gesuon ki raat guzri
sava neze pe ab suraj khada hai
mire khvabon ki chikni sidhiyon par
na jaane kis ka but tuuta pada hai
vo shole hon lahu ho hadse hon
miri hi zindagi par tabsira hai
tiri zulfen to hain badnam yunhi
mujhe din ke ujalon ne dasa hai
chalo chupke se kuchh but aur rakh aaen
dar-e-kaba abhi shayad khula hai
utar kar to fasil-e-shab se dekho
sahar ne khud-kushi kar li suna hai
abhi taq-e-tasavvur par ‘naimi’
charagh-e-lazzat-e-shab jal raha hai
Leave a Reply