Tajdar Adil
na fasle rahe qaa.em na qurbaten ab ke
ajiib haal se guzri hain ulfaten ab ke
hamare saath jo chalta tha vo nahin aaya
guzar chali hain baharon ki muddaten ab ke
har ik qadam pe sarab-e-vafa men Duube the
har ik qadam pe mili hain haqiqaten ab ke
vo yak-ba-yak jo milega to kaise dekhenge
hui hain jis se mile ham ko muddaten ab ke
baja.e naqd-e-vafa ke kuchh aur baat karo
badal ga.i hain jahan ki zaruraten ab ke
nahin hai sirf vo tanha main jaisa samjha tha
har ek shahr men dekhin shabahaten ab ke
main us se duur gaya tha to aa gaya ‘adil’
ḳhud apne-ap ye hain mujh ko hairaten ab ke
Leave a Reply