ḳhushi taqsim karti huun dil-azari nahin aati
mira maqsad hai gham-ḳhvari adakari nahin aati
yahan vo aage aata hai ki jo fankar hota hai
mujhe darveshi ke chole men ayyari nahin aati
abhi sab kuchh mayassar hai kami koi nahin baaqi
na-jane phir bhi pahle jaisi sarshari nahin aati
mire kuchh faisle mere nahin so darguzar karna
abhi sasural men rahti huun inkari nahin aati
main jab matam ko jaati huun kinare baiTh jaati huun
yunhi aansu bahati huun aza-dari nahin aati
chalo jo bhi hua ham maan ke rahen badalte hain
mujhe ab faislon men koi dushvari nahin aati
main apne kamre se saari kitaben le to aa.i huun
vo jis men lams tha tera vo almari nahin aati
Leave a Reply