in shokh hasinon ki ada aur hi kuchh hai
aur in ki adaon men maza aur hi kuchh hai
ye dil hai magar dil men basa aur hi kuchh hai
dil aina hai jalva-numa aur hi kuchh hai
ham aap ki mahfil men na aane ko na aate
kuchh aur hi samjhe the hua aur hi kuchh hai
be-khud bhi hain hoshiyar bhi hain dekhne vaale
in mast nigahon ki ada aur hi kuchh hai
‘azad’ huun aur gesu-e-pechan men giraftar
kah do mujhe kya tum ne suna aur hi kuchh hai
Leave a Reply