sone valon ko koi ḳhvab dikhane se raha
main tah-e-ḳhak to ab ḳhaak uḌane se raha
koi darvaza na haa.il koi dahliz rahi
ishq sahra men raha aur Thikane se raha
Duub jaa.en to kinare pe pahunch sakte hain
ab samundar to hamen paar lagane se raha
un diyon hi se kisi taur guzara kar lo
ab main kamre men sitaron ko to laane se raha
apne hathon hi shikar apna main kar luun na ‘munir’
aur kuchh der agar duur nishane se raha
Leave a Reply