khari baten ba-andaz-e-suḳhan kah duun to kya hoga
adu-e-jan-o-tan ko jan-e-man kah duun to kya hoga
nigahban-e-vatan ko rahzan kah duun to kya hoga
kisi bhi bad-chalan ko bad-chalan kah duun to kya hoga
gharibi jin ke latte le ga.i ta-hadd-e-uryani
jo main un ismaton ko sim-tan kah duun to kya hoga
andhere ko andhere hi kahenge dekhne vaale
savad-e-sham ko sub.h-e-vatan kah duun to kya hoga
ghalat baton pe duniya kab tavajjoh sarf karti hai
buton ko be-zaban o be-dahan kah duun to kya hoga
kahin fitrat badal sakti hai namon ke badalne se
janab-e-shaiḳh ko main barhaman kah duun to kya hoga
qad o gesu ko tum shamshad o sumbul kah ke kya loge
qad o gesu ko main dar-o-rasan kah duun to kya hoga
sitare toḌti hai jab ki zarron ki tavana.i
sitaron ko tumhari anjuman kah duun to kya hoga
sadarat ke fara.ez jab ada hone nahin paate
agar main tum ko sadr-e-anjuman kah duun to kya hoga
vo but ai ‘shad’ jab ghazlon men dilchaspi nahin leta
main us ki shaan men koi bhajan kah duun to kya hoga
Leave a Reply