apnon hi pe hoti hai har mashq-e-jafa pahle
ki chaak baharon ne phulon ki qaba pahle
us ke liye uTThe the go dast-e-dua pahle
bimar ki qismat se aa pahunchi qaza pahle
ab un ki jafaon ka kyon dahr se shikva hai
Daali thi hamin ne to buniyad-e-vafa pahle
mahsus ye hota hai jaise kabhi dekha ho
ai dost magar tujh ko dekha to na tha pahle
bimar-e-mohabbat ke andaz batate hain
tadbir-o-dava aḳhir taqdir-o-dua pahle
kya fikr hai divane mil ja.enge phir vo bhi
tu chak-e-gareban ko daman se mila pahle
‘shauq’ us ke tajassus men ye haal bhi guzra hai
puchha hai zamane se apna hi pata pahle
Leave a Reply