har sang men sharar hai tere zuhur ka
muusa nahin ki sair karun koh-e-tur ka
padhiye durud husn-e-sabih-o-malih par
jalva har ek par hai mohammad ke nuur ka
todun ye aaina ki ham-aghosh-e-aks hai
hove na muj ko paas jo tere huzur ka
bekas koi mare to jale us pe dil mira
goya hai ye charagh ghariban ki gor ka
ham to qafas men aan ke ḳhamosh ho rahe
ai ham-safir faeda nahaq ke shor ka
saaqi se kah ki hai shab-e-mahtab jalva-gar
de basma-posh ho ke tu saghar bilor ka
‘sauda’ kabhi na maniyo vaaiz ki guftugu
avaz-e-duhul hai ḳhush-aind duur ka