maiḳhane pe chha.i hai afsurda-shabi kab se
saghar se gurezan hai ḳhud tishna-labi kab se
ai saya-e-gesu ke divano batao to
me.ar-e-junun Thahri rahat-talabi kab se
chusa hai lahu jis ne barson mah-o-anjum ka
insan ka muqaddar hai vo tira-shabi kab se
ik hashr sa barpa hai zindan se bayaban tak
paband-e-salasil hai iza-talabi kab se
jis ke liye saaz apna sar phoḌte phirte hain
naghmon ki vo daulat hai siine men dabi kab se
jo dar-o-rasan ko bhi ḳhatir men nahin laati
ta.azir ke qabil hai vo be-adabi kab se
fursat gham-e-dauran se milti hi nahin ‘arshad’
dil men liye phirte hain mauj-e-inabi kab se
Leave a Reply