Masoom Sharqi
manzilen kya bata.en main kya huun
zindagi ka udaas rasta huun
tu ḳharosh-e-talatum-e-dariya
main sukut-e-sarab-e-sahra huun
kaam aa.i na kuchh shanasa.i
shahar ki bhiiḌ men akela huun
main tiri justuju ke sahra men
raqs karta hua bagula huun
ḳhar-o-ḳhas hi sahi magar yaaro
main bhi sahn-e-chaman ka hissa huun
chashm-e-ibrat se dekhiye mujh ko
apni tahzib ka janaza huun
aap apni suna.iye ‘ma.asum’
meri kya puchhte hain achchha huun
Leave a Reply