Mera Sina Hai Mashriq Aaftab-E-Dagh-E-Hijran Ka

mira siina hai mashriq aftab-e-dagh-e-hijran ka

tulu-e-subh-e-mahshar chaak hai mere gareban ka

azal se dushmani taus o maar aapas men rakhte hain

dil-e-pur-dagh ko kyunkar hai ishq us zulf-e-pechan ka

kisi khurshid-ru ko jazb-e-dil ne aaj khincha hai

ki nur-e-subh-e-sadiq hai ghubar apne bayaban ka

chamakna barq ka lazim pada hai abr-e-baran men

tasavvur chahiye rone men us ke ru-e-khandan ka

diya mere janaze ko jo kandha us pari-ru ne

guman hai takhta-e-tabut par takht-e-sulaiman ka

kisi se dil na is vahshat-sara men main ne atkaya

na uljha khaar se daman kabhi mere bayaban ka

tah-e-shamshir-e-qatil kis qadar bashshash tha ‘nasikh’

ki aalam har dahan-e-zakhm par hai ru-e-khandan ka

Leave a Comment