Akram Naqqash
ba-rang-e-ḳhvab main bikhra rahunga
tire inkar jab chunta rahunga
kabhi socha nahin tha main tire bin
yuun zer-e-asman tanha rahunga
tu koi aks mujh men DhunDna mat
main shisha huun faqat shisha rahunga
ta.affun-zar hoti mahfilon men
ḳhayal-e-yar se mahka rahunga
jiyunga main tiri sanson men jab tak
ḳhud apni saans men zinda rahunga
gali bazar baḌhti vahshaton ko
main tere naam hi likhta rahunga
Leave a Reply