Mahesh Chandra Naqsh
muddat men idhar phir vo gul-bar nazar aa.e
sahra men baharon ke asar nazar aa.e
kya raz-e-mashiyyat tha ham alam-e-hasti men
majbur rahe lekin muḳhtar nazar aa.e
masti-bhari ankhon se jab us ne hamen dekha
masrur nazar aa.e sarshar nazar aa.e
dekhe hain mohabbat ke ham ne ye karishme bhi
ik baar chhupe gar vo sau baar nazar aa.e
phir mast ghaTa chha.i phir paḌne lagin bunden
phir jam-ba-kaf har-su mai-ḳhvar nazar aa.e
mad.hosh fazaon men phir qaus-e-quzah damki
phir qamat-e-rangin ke anvar nazar aa.e
un mast nigahon ne ḳhud apna bharam khola
inkar ke parde men iqrar nazar aa.e
ham bada-paraston ne chheḌi jo hadis-e-mai
khulte hue duniya ke asrar nazar aa.e
har ruuh men dekhi hai ai ‘naqsh’ ḳhalish gham ki
har phuul ke pahlu men kuchh ḳhaar nazar aa.e
Leave a Reply