saval-e-ishq par ta-hashr chup rahna paḌa mujh ko
har ik ilzam ko hanste hue sahna paḌa mujh ko
kabhi maghrur tufanon ko bhi Thukra diya main ne
kabhi ik mauj-e-gham ke saath hi bahna paḌa mujh ko
sukun-e-dil baḌi daulat sahi ai ham-nashin lekin
sukun pa kar bhi akasr muztarib rahna paḌa mujh ko
zamana kis qadar be-gana-e-rasm-e-mohabbat tha
yahan to ḳhud se bhi na-ashna rahna paḌa mujh ko
‘ravish’ is bazm-e-rangin men sukut-e-gham ka afsana
kaha jaata na tha mujh se magar kahna paḌa mujh ko
Leave a Reply