Rehman Faris
main kar-amad huun ya be-kar huun main
magar ai yaar tera yaar huun main
jo dekha hai kisi ko mat batana
ilaqe bhar men izzat-dar huun main
ḳhud apni zaat ke sarma.e men bhi
sifar fisad ka hisse-dar huun main
aur ab kyuun bain karte aa ga.e hon
kaha tha na bahut bimar huun main
miri to saari duniya bas tumhi ho
ghalat kya hai jo duniya-dar huun main
kahani men jo hota hi nahin hai
kahani ka vahi kirdar huun main
ye tai karta hai dastak dene vaala
kahan dar huun kahan divar huun main
koi samjha.e mere dushmanon ko
zara si dosti ki maar huun main
mujhe patthar samajh kar pesh mat aa
zara sa rahm kar jan-dar huun main
bas itna soch kar kiije koi hukm
baḌa munh-zor ḳhidmat-gar huun main
koi shak hai to be-shak aazma le
tira hone ka da.ave-dar huun main
agar har haal men ḳhush rahna fan hai
to phir sab se baḌa fankar huun main
zamana to mujhe kahta hai ‘faris’
magar ‘faris’ ka parda-dar huun main
unhen khilna sikhata huun main ‘faris’
gulabon ka suhulat-kar huun main
Leave a Reply