vahi jo manzil-e-shams-o-qamar men rahta hai
vo husn ban ke hamari nazar men rahta hai
nazar ko apni chhupa.e hue huun main sab se
ki ek parda-nashin is nazar men rahta hai
tumhari diid ka arman jo ghaT gaya dil men
vo ban ke naala talash-e-asar men rahta hai
asir-e-zulf-e-parishan huun is liye ai dost
mira ḳhayal hamesha safar men rahta hai
qafas ki zindagi-e-be-maza ko kab hasil
jo lutf yurish-e-barq-o-sharar men rahta hai
jidhar nigah uTha.un usi ka aks ubhre
usi ka jalva ‘jamali’ nazar men rahta hai
Leave a Reply