aaj to hamdam azm hai ye kuchh ham bhi rasmi kaam karen
kilk utha kar yaar ko apne nama-e-shauq arqam karen
khubi se alqab likhen adab bhi khush-aini se
baad is ke ham tahrir mufassal furqat ke alam karen
ya khud aave aap idhar ya jald bulave ham ko vahan
is matlab ke likhne ko bhi khuub sa sar-anjam karen
husn ziyada aan moassir naaz ki shokhi ho vo chand
aise kitne harf likhen aur naae ko ashmam karen
sun kar vo hans kar yuun bola ye to tumhen hai fikr abas
aql jinhen hai vo to hargiz ab na khayal-e-kham karen
kaam yaqinan hai vahi achchha jo ki ho apne mauqaa se
baat kahen ya naama likhen yaaro subh se shaam karen
is men bhala kya hasil hoga soch to dekho miyan ‘nazir’
vo to khafa ho phenk de khat aur log tumhen bad-nam karen
Leave a Reply