vo chand ho ki chand sa chehra koi to ho
in khidkiyon ke paar tamasha koi to ho
logo isi gali men miri umr kat gai
mujh ko gali men janne vaala koi to ho
mujh ko to apni zaat ka isbat chahiye
hota hai aur mere alava koi to ho
jis samt jaiye vahi dariya hai samne
is shahr se farar ka rasta koi to ho
apne siva bhi main koi avaz sun sakun
vo barg-e-khushk ho ki parinda koi to ho
yuun hi khayal aata hai banhon ko dekh kar
in tahniyon pe jhulne vaala koi to ho
ham is udhed-bun men mohabbat na kar sake
aisa koi nahin magar aisa koi to ho
mushkil nahin hai ishq ka maidan marna
lekin hamari tarah nihatta koi to ho
Leave a Reply