Navneet Sharma
ḳhud se us ne najat pa li hai
raah ‘navnit’ ne nikali hai
ḳhushk ankhon ke as-pas kahin
dil ne ik jhiil si bana li hai
lahlahate hain dard ke paude
ishq ka bagh, yaad maali hai
raund jaata hai ye kinaron ko
ise dariya kahen? mavali hai
ek tasvir ko haTaya bas
dil ki divar ḳhali ḳhali hai
aap ka naam bhi nahin lete
pyaas honTon pe ab saja li hai
ai thakan kuchh to bol, kya tu ne
manzilon men jagah bana li hai
main hua kamyab mar kar bhi
aankh qatil ne vo jhuka li hai
kya bharosa milen vo ya na milen
ham ne ik aarzu kama li hai
Leave a Reply