Minu Bakshi
but ki manind na apne ko bana.e rakhna
jis jagah rahna vahan dhuum macha.e rakhna
ḳhud ko dariya men na qatron sa mila.e rakhna
munfarid hone ka ehsas dila.e rakhna
kaam farzana-e-duniya ka nahin ai naseh
parcham-e-ishq zamane men uTha.e rakhna
chashm-e-maḳhluq hai mizan-e-raza-e-maula
chashm-e-maḳhluq men ḳhud ko na gira.e rakhna
tujh ko dena ho agar zulmat-e-hijran ko shikast
sham.a bujh jaa.e magar dil na bujha.e rakhna
qalb-e-ḳhuddar ki ḳhatir to hai zillat ka sabab
lau sada us but-e-kafir se laga.e rakhna
jis se milti ho har ik lahza ghazal ki ḳhushbu
sehn-e-ehsas men vo phuul khila.e rakhna
mere dil ko to kisi haal men manzur nahin
fikr-e-duniya men tiri yaad bhula.e rakhna
Leave a Reply