asman se chhin gaya jab chand taron ka libas
shabnami kapḌon men lipTi thi zamin ki narm ghaas
toḌ kar divar lamhon ki hua jab ru-ba-ru
main bhi afsurda tha us ka dil bhi tha behad udaas
maujzan imroz ka khara samundar tha bahut
teri yadon ke jazire the magar kuchh as-pas
jab badan kaliyon ka suraj ki kiran chhune lagi
os ki bundon ne paaya ḳhud ko behad bad-havas
mere tan men ḳhema-zan thi ik sulagti dopahar
vo bhi tha pahne hue barfile mausam ka libas
jism ki chadar lapeTe tha ‘kanval’ vo gul-badan
main bhi us se reza-reza ho raha tha ru-shanas
Leave a Reply