Bismil Azimabadi
ruḳh pe gesu jo bikhar ja.enge
ham andhere men kidhar ja.enge
apne shane pe na zulfen chhoḌo
dil ke shiraze bikhar ja.enge
yaar aaya na agar va.ade par
ham to be-maut ke mar ja.enge
apne hathon se pila de saaqi
rind ik ghunT men tar ja.enge
qafile vaqt ke rafta rafta
kisi manzil pe Thahar ja.enge
muskurane ki zarurat kya hai
marne vaale yunhi mar ja.enge
ho na mayus ḳhuda se ‘bismil’
ye bure din bhi guzar ja.enge
Leave a Reply