har dil jo hai betab to har ik aankh bhari hai
insan pe sach-much koi uftad paḌi hai
rah-rau bhi vahi aur vahi rahbari bhi
manzil ka pata hai na kahin raah mili hai
muddat se rahi farsh tiri rahguzar men
tab ja ke sitaron se kahin aankh laḌi hai
aisa bhi kahin dekha hai mai-ḳhane ka dastur
har chashm hai labrez har ik jaam tahi hai
ruḳhsar-e-baharan pe chamakti hui surḳhi
kahti hai ki gulshan men abhi sub.h hui hai
samjha hai tu zarre ko faqat zarra-e-nachiz
chhoTi si ye duniya hai jo suraj se baḌi hai
duniya men koi ahl-e-nazar hi nahin baaqi
kotah-nigahi hai tiri kam-nazari hai
mad.hosh faza mast hava hosh ki mat puchh
varaftagi-e-shauq hai ik gum-shudagi hai
kanTon pe chale hain to kahin phuul khile hain
phulon se mile hain to baḌi choT lagi hai
phir soch lo ik baar abhi vaqt hai ‘javed’
shikve men kuchh andesha-e-ḳhatir-shikani hai
Leave a Reply