jab jab main zindagi ki pareshaniyon men tha
apnon ke bavajud bhi tanha.iyon men tha
abadiyon ne saare bharam hi miTa diye
is se ziyada ḳhush to main viraniyon men tha
sahil pe jo khaḌe the unhen mauj le ga.i
main bach gaya ki yaar main tughyaniyon men tha
asaniyon men ziist hi be-kaif ho ga.i
jiine ka asl lutf to dushvariyon men tha
karta bhi kya kisi se shifa ki koi umiid
saara ka saara shahr hi bimariyon men tha
jo sada-lauh the vo nasibon men rah ga.e
chalak jo bhi shaḳhs tha achchha.iyon men tha
kuchh aap hi ne ghaur se Daali nahin nazar
mera bhi naam aap ke shaida.iyon men tha
baten to satta par yuun bahut si huiin magar
mera dimagh jhiil ki gahra.iyon men tha
‘nayab’-bha.i ban ke gale jo mila tha kal
us shaḳhs ka shumar bhi danga.iyon men tha
Leave a Reply