Nitin Nayab
baat bah jaane ki sun kar ashk barham ho ga.e
ik zara koshish bhi ki to aur pur-nam ho ga.e
ye hua ma.amul ki manus-e-gham dil ho gaya
ham samajh baiThe hamare dard kuchh kam ho ga.e
kaifiyat iz.har-e-soz-e-dil ki kuchh aisi hui
aate aate lab talak alfaz mub.ham ho ga.e
vaqt ki charagari bhi dekhiye kya ḳhuub hai
gham dava men Dhal gaya aur zaḳhm mahram ho ga.e
gardishon ke abr ki ik buund tan par kya giri
kal jo the sho.ala-sifat vo aaj shabnam ho ga.e
the hamare ḳhuun ke qatre ḳhaak ki surat ḳhuda
tere naqsh-e-pa ko chhu kar ab-e-zamzam ho ga.e
dushmani baḌhne ka yuun ‘nayab’ gham ham ko nahin
haan magar afsos ye hai dost kuchh kam ho ga.e
Leave a Reply