Poet
har ek rang men yuun Duub kar nikharte rahe
ḳhutut naqsh-e-musavvir men rang bharte rahe
ḳhuda bacha.e bagulon ki zad men aa.e hain
vo barg-e-sabz jo mauj-e-hava se Darte rahe
unhin ke paanv se lipTi hui hai mauj-e-hayat
jo be kanar samundar ke paar utarte rahe
kahan thi jur.at-e-nazzara-e-jamal-e-sahar
agarche gesu-e-shab rat-bhar sanvarte rahe
vahin bahar-ba-kaf qafile lapak ke chale
jahan jahan tire naqsh-e-qadam ubharte rahe
agarche basta-e-dam-e-ḳhayal the lekin
kushuda uqda-e-lail-o-nahar karte rahe
unhin ke saath hai apna safar ‘tamanna.i’
vo ḳhush-ḳhiram jo har daur se guzarte rahe
Leave a Reply