Poet
niim bismil ki kya ada hai ye
ashiqo loTne ki ja hai ye
shab-e-vasl-e-sanam vila hai ye
bose honTon ki le maza hai ye
dil ko kyuun pa.emal karte ho
na to sabza hi na hina hai ye
kaaT kar sar laga.iye Thokar
qatl-e-ashiq ka ḳhun-baha hai ye
dud-e-dil kyuun na rashk-e-sumbul ho
atish-e-husn se jala hai ye
zulf men kyuun na dil rahe bedar
lailatul-qadr se siva hai ye
ankhen us ki siyah hain az-ḳhud
tutiya kis ka tutiya hai ye
kya hai nam-e-ḳhuda hai mera sanam
but jise kahte hain ḳhuda hai ye
zulf men dil mudam rahta hai
dekhna kis ke sar chaḌha hai ye
dar pe nalan jo huun to kahta hai
puchho kya chiiz bechta hai ye
chumta huun main apne dil ke qadam
bosa-e-yar ka gada hai ye
dafn masjid men mere dil ko karo
taq-e-abru pe mar gaya hai ye
taq-e-abru-e-yar ko dekhun
ain ka.abe men iltija hai ye
qad-e-janan nahin qayamat hai
zulf-e-janan nahin bala hai ye
go sanam murde zinde karta hai
kaun kafir kahe ḳhuda hai ye
ho shahadat nasib ‘goya’ ko
fidvi-e-shah-e-karbala hai ye
Leave a Reply