obaidullah-aleem

Dukhe Hue Hain Hamein Aur Ab Dukhao Mat

dukhe hue hain hamen aur ab dukhao mat

jo ho gae ho fasana to yaad aao mat

khayal-o-khvab men parchhaiyan si nachti hain

ab is tarah to miri ruuh men samao mat

zamin ke log to kya do dilon ki chahat men

khuda bhi ho to use darmiyan laao mat

tumhara sar nahin tiflan-e-rah-guzar ke liye

dayar-e-sang men ghar se nikal ke jaao mat

sivae apne kisi ke bhi ho nahin sakte

ham aur log hain logo hamen satao mat

hamare ahd men ye rasm-e-ashiqi thahri

faqir ban ke raho aur sada lagao mat

vahi likho jo lahu ki zaban se milta hai

sukhan ko parda-e-alfaz men chhupao mat

supurd kar hi diya atish-e-hunar ke to phir

tamam khaak hi ho jaao kuchh bachao mat

More Poems

Leave a Comment